Bi positiv überrascht worde vo miner erste Tour im Sac Zofige (nach 2 Jahr Metgliedschaft😅) es esch zwar chli schad gsii das mer s ganze Wochenend im Schatte verbrocht hend, bi dem schöne Wetter, aber defür hemmer üs nach ere chorze Ihfüerig am Samstig morge rechtig chönne ustobe am iis. Als Abschloss vom Tag hets denn, nach ere improvisierte Rettigsüebig en grooosse Topf Spaghetti gää und am Dessert hets de also au ned gfählt. Es esch denn leider no en 2,5 kg grosse Schoggiglace-Chübel, wo nebebii 5000.- Wert gha hätt ;), und en halbe Topf Spaghetti übrig blibe. Nach ere warme Nacht i üsem feudale Studio (und ned im Biwak) semmer de nach em Zmorge weder zu de Iisfäll gange, wo sich denn no 2 Seilschafte an ere msl. versuecht hend, aber denn ufgrund vo z schlechte iisverhältnis hend müesse kapituliere. Nach dem sich denn alli a de Wasserfäll, oder a de Drietol-Routene uspoweret hend hets de für die einte no es erfrüschemds Iisbad gää🥶 und somit esch denn das Wochenend au abgrundet gsii und mer hend üs weder ufe Wäg rechtig Zofige gmacht. Bericht: Lukas Bühler
