Gstartet hemmer mit em Alpabzug de Klausepass durab, wo ned ganz ikalkuliert gsi esch. Ergendeinisch simmer denne adene siebe Gruppe Chüeh verbii cho und met em Seilbähnli ufe Fisetepass, vo dete denne wiiter Richtig Gemsfairenstock. Unterwegs het de Jonas leider müesse umchehre, well er vode nasse WK üebig, so wies tönt het, en Lungeentzündig igfange het. Ziemli nass semmer denne be de Claridehütte acho und hend Spieli gspielt mit viel Vizekönige.
Wo d Fraue erfahre hend, dass es wegem Jubiläum 125 Jahr Claridehütte en Brunch zum z Morge git, hett denne de René am Morge chum chönne glaube, dass er am achti am Morge Rösti esst und nanig ufem Gipfel staht.
Endlich richtig Gipfel, über en Gletscher mit viel Labyrinth, het de René eus insturiert, dass Öpfel ufeträge sinnlos esch und denne dankend in en Öpfel bisst. Früsch gstärkt hemmer s Mount-Everest Feeling met em Neuschnee gnosse bis de Gipfelufstig agfange het. De esch wettermässig eher wechselhaft mit begrenzter Sicht gsi, aber wenn Helde reised, hets doch sunne ufem Gipfel gha und d Feldstecher hend chönne bruucht werde.
De Abstiig het sich denne weg fehlende Sohle (euses Bileid Beat) echli länger gstaltet als agnah, deför mit vielne interessante Gspröch! Bericht: Veronika Schneiter
