Am 5.30 hämmer eus en Zofige troffe. De semmer ab rechtig Realp ond am 7.15 ihtroffe. Nachdem sech alli parat gmacht hend, semer met 5 Minute verspötig, am 7.20 losgloffe rechtig Tälligrat öbere Wenterwäg.
Of dene 1200 Höhemeter send mer teils met dechte Wolke ond teils met Sonne begleitet worde. De Wind esch euse ständig begleiter gsi. De Matthias euses Toureleiter het eus öbere Grot zom Gipfel brocht. Det hets g'chutet aber zom Glöck ou schönste Sonneschin gha! Schnell hämmer eus parat gmacht ond send em troumhafte Polverschnee abegfahre.
Onde acho, hämer eusi wohlverdiente Sandwich gässe ond sogar en moment windstilli gnosse.
Am Bach entlang, ofem Sommerweg (danke dör das super schöne Foti Heinz!) semmer weder zrogg rechtig Realp ond glücklich ond zfrede om die 13.30 ofem Pakrplatz acho.
Es esch eine fo dene wenig Täg gsi wome meteme 9 fo 10 darf bewärte (s'10ni gets jo ned)! Danke a die ganz Mannschaft ond die neue Bekanntschafte! Bis zum nächsten Mal. Bericht: Lisa Eggler
